ភ្នំពេញ៖ រាជរដ្ឋាភិបាលបានផ្ដល់ប្រាក់ជូនដល់គ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធជំងឺកូវីដ-១៩ ចាប់ពីថ្ងៃទី២៥ ខែមិថុនា ឆ្នាំ២០២០ រហូតដល់ថ្ងៃទី២៤ ខែកញ្ញា ឆ្នាំ២០២១ អស់៤៤០,៨១លានដុល្លារអាមេរិក។

ក្រសួងសង្គមកិច្ចបានឱ្យដឹងថា ចាប់តាំងពីអនុវត្តកម្មវិធីឧបត្ថមសាច់ប្រាក់មកដល់ពេលនេះរដ្ឋាភិបាលបានបើកជូនពលរដ្ឋចំនួន៦ជុំរួចមកហើយ ទៅដល់គ្រួសារក្រីក្រ និងងាយរងគ្រោះចំនួន ៦៧៣ ៤៨៧គ្រួសារ ដែលបានជួយដល់ពលរដ្ឋចំនួនជិត៣លាននាក់ (២ ៦៦០ ៧២៦)។

កាលពីថ្ងៃទី២៤ ខែមិថុនា ឆ្នាំ២០២០ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រកាសដាក់ឱ្យអនុវត្តជាផ្លូវការនូវកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឹកូវីដ១៩។

រហូតមកដល់ពេលនេះកម្ពុជាបានផ្ដល់សាច់ប្រាក់ជូនពលរដ្ឋងាយរងគ្រោះទចំនួន៦ជុំ ដែលមាន១៥លើករួចមកហើយ ខណៈការបើកផ្ដល់សាច់ប្រាក់ជុំទី៦ លើកទី៣ នឹងចាប់ផ្ដើមពីថ្ងៃទី២៥ ខែកញ្ញានេះរហួត ដល់ថ្ងៃទី២៤ ខែតុលា ឆ្នាំ២០២១៕